బతుకుతెరువు కోసం పరాయి దేశం వెళ్ళి ఉద్యోగమో ..సద్యోగమో చూసుకోక ...ఓ అయిదుగురు ప్రవాసీయులు తమ చోరకళను ప్రదర్శించారు..అందుకు తగిన ప్రతిఫలాన్ని పొందారు. దోహా నేర న్యాయస్థానం ఒకొక్కరికి మూడు సంవత్సరాల జైలుశిక్ష అనంతరం దేశ బహిష్కరణ శిక్ష విధించింది. ఈ నిందితులు అనేక గృహాలను విచ్ఛిన్నం చేసి తరువాతి ఆ ఇళ్ళల్లో డబ్బు మరియు ఆభరణాలు దొంగిలించేవారని పోలీసులు నివేదించారు. ఓ బాధితుడు విదేశాల్లో పర్యటన ముగించుకొని తిరిగి ఇంటికి వచ్చిన ఆయన తన వంటగది తలుపు విరిగి ఉండటం బంగారు ఆభరణాలతో పాటు 6,000 కతర్ రియాళ్ళు అపహరణకు గురైనట్లు గుర్తించి లబోదిబోమని స్థానిక పోలీసులకు పిర్యాదు చేయడంతో ఈ కేసు పై దర్యాప్తు  ప్రారంభమైంది. పోలీసుల పరిశోధనలలో ఓ ఐదుగురు ముద్దాయిల బృందం ఈ దొంగతనాలకు సూత్రకర్తలుగా నిర్ధారించారు. వీరు పలు వీధులలో తిరుగుతూ తాళాలు వేసిన ఇళ్లను ఎంతో శ్రద్ధగా పరిశీలించేవారు ..ఆయా ఇంటి యజమానులు బైటకు వెళ్లినప్పుడో..లేక వారు దేశం వెలుపల పర్యటనల కోసం వెళ్లిన తర్వాత ఆ ఇళ్లను చూడటం...ఆ తర్వాత  ఎవరూ గమనించని సమయంలో ఆ ఇంటి లోనికి చొరబడి  ఎంచక్కా దోచుకొనేవారు. పోలీసుల పరిశోధనలలో ఈ అయిదుగురు ప్రవాసీయులు ఇదే తరహాలో పలు దొంగతనాలు చేసినట్లు దర్యాప్తులో వెలుగు చూసింది.