ప్రజల రక్షణార్ధమై రేయంబగళ్లు కాపలా కాచే పోలీస్ అధికారులు తీవ్రవాదుల రక్త దాహానికి బలి కాబడుతున్నారు. ఈ సంఘటన అదే కోవలోనికి చెందుతుంది. స్థానిక అల్-మాసౌరా జిల్లాలోని ఖతిఫ్ ప్రాంతంలో ఆదివారం బాగా పొద్దుపోయాక గుర్తించబడని అనుమానితులు పేల్చిన ఒక పేలుడు పరికరం ఒక అత్యవసర దళాల అధికారిని దారుణంగా హతమార్చి మరో ఇద్దరు అధికారులను తీవ్రంగా గాయపరిచింది. మరణించిన ఆ అధికారి పేరు మేజర్ తారిక్ బిన్ అబ్దుల్లాతఫ్ అల్-అల్లాఖీగా పేర్కొంటున్నారు. ఖతిఫ్ సమీపంలో గస్తీ నిర్వహిస్తున్న ఈ ముగ్గురు అధికారులు ప్రయాణిస్తున్న వాహనంను ఒక పేలుడు పదార్ధాలతో కూడిన పరికరం ఏదో బలంగా ' ఢీ ' కొట్టింది. దీనితో అక్కడ ఒక భారీ విస్ఫోటనం జరిగినట్లు అంతర్గత మంత్రిత్వ శాఖ ప్రతినిధి " మా గల్ఫ్ డాట్ కామ్ " ప్రతినిధికి తెలిపారు. కాగా ఈ ఘటనలో తీవ్రంగా గాయపడిన ఇద్దరు అధికారులను స్థానిక ఆసుపత్రికి తరలించినట్లు పేర్కొన్నారు. వారి పరిస్థితి ప్రస్తుతం స్థిరంగా ఉందని ఆయన  తెలిపారు.