మనామా: అల్‌ హలా స్పోర్ట్స్‌ క్లబ్‌ వద్ద జరిగిన దాడి ఘటనకు సంబంధించి పలువురు బహ్రెయినీ యువకుల్ని పోలీసులు అదుపులోకి తీసుకున్నారు. స్పోర్ట్స్‌ క్లబ్‌లోకి ప్రవేశించిన నిందితులు, అందులోని ఆటగాళ్ళపై దాడికి దిగారని పోలీసులు చెప్పారు. ఈ ఘటనలో నేషనల్‌ కోచ్‌ అబ్దుల్‌నాజర్‌ హసన్‌, అలాగే ఆయన అసిస్టెంట్‌ కూడా గాయపడ్డారు. గాయపడ్డ వారిని ఆసుపత్రికి తరలించారు. ఆటగాళ్ళతో ఓ వ్యక్తికి ఏర్పడ్డ చిన్నపాటి గొడవ, ఈ దారుణానికి కారణంగా గుర్తించారు. స్నేహితుల్ని తీసుకొచ్చి, క్లబ్‌పై ఆ యువకుడు దాడి చేయించినట్లు పోలీసులు చెప్పారు. కేసును న్యాయస్థానానికి విచారణ నిమిత్తం బదిలీ చేశారు. సీసీటీవీ ఫుటేజ్‌ల ఆధారంగా అరెస్టులు జరిగినట్లు అధికారులు తెలిపారు.