ఉత్తర అమెరికా, యూరప్, ఆస్ట్రేలియా, న్యూజిలాండ్‌ దేశాల్లోని పురుషుల్లో పునరుత్పత్తి శక్తి ఘోరంగా పడిపోతుంది. అంటే, వారి స్పెర్మ్‌ (వీర్యం) కౌంట్‌ వేగంగా పడిపోతోంది. 1973 నుంచి 2011 సంవత్సరాల మధ్య ఈ దేశాల పురుషుల్లో స్పెర్ప్‌ కౌంట్‌ 50 నుంచి 60 శాతానికి పడిపోయినట్లు జెరూసలెంలోని హెబ్రూ యూనివర్శిటీ నిర్వహించిన ఓ తాజా అధ్యయనంలో తేలింది. 42,935 మంది శాంపిళ్లను అధ్యయనం చేయగా ఈ విషయం వెలుగులోకి వచ్చింది.

అయితే ఆశ్చర్యంగా ఆసియా, ఆఫ్రికా, దక్షిణ అమెరికా దేశాల పురుషుల్లో వీర్య కౌంట్‌ స్థిరంగానే కొనసాగుతోందని ఆ ఆధ్యయనం తెలిపింది. అయితే ఈ దేశాల పురుషుల వీర్యానికి సంబంధించిన డేటా తమ వద్ద ఎక్కువగా లేకపోవడం వల్ల కూడా తగ్గిందా, లేదా ? అన్న అంశాన్ని అంత కచ్చితంగా చెప్పలేకపోతున్నామని పరిశోధకులు తెలిపారు. ఉత్తర అమెరికా, యూరప్, ఆస్ట్రేలియా, న్యూజిలాండ్‌ దేశాల్లో తగ్గిన విషయాన్ని తాము స్పష్టంగా గుర్తించామని, అందులో ఎలాంటి సందేహం లేదని వారంటున్నారు. ఈ పరిస్థితి ఇలాగే కొనసాగితే 2060 నాటికి ఈ దేశాల్లో పురుషుల్లో పునురుత్పత్తి శక్తి పూర్తిగా పడిపోతుందని పరిశోధకులు హెచ్చరించారు.

ధూమపానం, వాతావరణ కాలుష్యమే స్పెర్మ్‌ కౌంట్‌ పడిపోవడానికి కారణమని పరిశోధకులు అనుమానిస్తున్నారు. బిస్ఫెనాల్‌ ఏ లాంటి రసాయనాలు, ఇతర విష రసాయనాల ప్రభావానికి గురవడం వల్ల స్పెర్మ్‌ కౌంట్‌ పడిపోతుందని గుర్తించామని, అయితే ఈ విషయంలో మరింత లోతుగా పరిశోధనలు జరగాల్సిన అవసరం ఉందని హెబ్రూ యూనివర్శిటీ పరిశోధకలు తెలిపారు. గతంలో అనుమానించినట్లుగా స్థూలకాయానికి, స్పెర్మ్‌ కౌంట్‌ పడిపోవడానికి మాత్రం ఎలాంటి సంబంధం లేదని వారన్నారు.