'జెంటిల్‌మన్‌', 'అమీ తుమీ' హిట్‌ల తర్వాత దర్శకుడు ఇంద్రగంటి మోహనకృష్ణ తన తర్వాత చిత్రానికి సన్నాహాలు చేస్తున్నారు. ప్రస్తుతం ఆయన ఈ చిత్రం కథను సిద్ధం చేసే పనిలో ఉన్నారట. ఈసారి స్వచ్ఛమైన ప్రేమకథతో ప్రేక్షకుల ముందుకు రాబోతున్నట్లు ఇంద్రగంటి తెలిపారు. ఈ విషయాన్ని ఆయన ఓ ఆంగ్ల పత్రికతో పంచుకున్నారు.
'ప్రేమకథ తెరకెక్కించాలని చాలా రోజులుగా అనుకుంటున్నా. కానీ కుదరలేదు. ఈసారి నా తర్వాత సినిమాతో అది జరిగేలా ఉంది. స్వచ్ఛమైన ప్రేమకథగా ఆ సినిమా రాబోతోంది. దీనికి సంబంధించిన కథ దాదాపు సిద్ధం చేశా, నటీనటులను ఎంపిక చేయాలి' అని ఇంద్రగంటి అన్నారు. అనంతరం నటీనటులుగా ఎవరిని అనుకుంటున్నారని ప్రశ్నించగా.. 'ఇంకా ఏదీ నిర్ధారణ కాలేదు. అప్పుడే నటీనటుల గురించి మాట్లాడటం సరికాదు' అని చెప్పారు.