''బాహుబలి'తో ప్రపంచం మొత్తం తెలుగు సినిమా వైపు చూసింది. భవిష్యత్తులోనూ ఇలాంటి గొప్ప చిత్రాలు మరిన్ని రావాల''న్నారు తెలంగాణ సినిమాటోగ్రఫీ మంత్రి తలసాని శ్రీనివాస యాదవ్‌. హైదరాబాద్‌లో జరిగిన 'సంతోషం' పురస్కారాల వేడుకలో ఆయన పాల్గొన్నారు. 'ప్రేమమ్‌' చిత్రానికి గానూ నాగచైతన్యకు ఉత్తమ నటుడు అవార్డు దక్కింది. సమంత (అఆ) ఉత్తమ నటిగా ఎంపికైంది. ఉత్తమ దర్శకుడిగా బోయపాటి శ్రీను (సరైనోడు) అవార్డు అందుకొన్నారు. ఉత్తమ చిత్రంగా 'పెళ్లిచూపులు' నిలిచింది. ఈ సందర్భంగా తలసాని శ్రీనివాస యాదవ్‌ మాట్లాడుతూ ''తెలుగు సినీ పరిశ్రమకు కావల్సిన సహాయ సహకారాల్ని అందివ్వడానికి ప్రభుత్వం సిద్ధంగా ఉంది. పరిశ్రమలో కొన్ని సమస్యలున్నాయి. కూర్చొని మాట్లాడుకొంటే అవన్నీ పరిష్కారమైపోతాయ''న్నారు. దాసరి నారాయణరావు స్మారక పురస్కారాల్ని అల్లు అరవింద్‌, మురళీమోహన్‌, పరుచూరి బ్రదర్స్‌ అందుకొన్నారు.