ట్విటర్‌లో రెచ్చగొట్టే పోస్టులు పెడుతూ విమర్శలపాలయ్యే బాలీవుడ్‌ సీనియర్‌ నటుడు రిషికపూర్‌ తాజాగా మరో వివాదంలో ఇరుక్కున్నారు. ఓ చిన్నారి అసభ్య ఫొటోను ట్విటర్‌లో పెట్టినందుకు ఆయనపై ముంబయిలోని సైబర్‌ పోలీస్‌ స్టేషన్‌లో కేసు నమోదైంది. లైంగిక నేరాల నుంచి పిల్లలకు రక్షణ కల్పించే చట్టం(పోస్కో) కింద ఎఫ్‌ఐఆర్‌ నమోదు చేయాలని 'జైహో' అనే స్వచ్ఛంద సంస్థ అధ్యక్షుడు అఫ్రోజ్‌ మాలిక్‌ చేసిన ఫిర్యాదుతో పోలీసులు ఈ కేసు నమోదు చేశారు.
'రిషికపూర్‌కు ట్విటర్‌లో 2.6 మిలియన్ల ఫాలోవర్లు ఉన్నారు. అంటే ఆ అసభ్యకర చిత్రాన్ని అంతమంది చూశారు. పైగా దానికి 66 రీట్వీట్‌లు, 476 లైక్స్‌ వచ్చాయి' అని మాలిక్‌ వ్యాఖ్యానించారు. మహారాష్ట్రకు చెందిన జైహో స్వచ్ఛంద సంస్థ ఆ రాష్ట్రంలో మహిళల, పిల్లల అభివృద్ధి కోసం పాటుపడుతోంది.