స్పెయిన్: సోషల్‌ మీడియా దిగ్గజం ఫేస్‌బుక్‌కు గట్టి ఎదురుదెబ్బ తగిలింది. యూజర్ల డేటాను ప్రకటనకర్తలకు అందుబాటులో లేకుండా నిరోధించడంలో విఫలమైనందుకు ఫేస్‌బుక్‌కు 1.2 మిలియన్‌ డాలర్ల జరిమానా విధించినట్టు స్పెయిన్‌కు చెందిన డేటా ప్రొటెక్షన్‌ సంస్థ తెలిపింది. ఫేస్‌బుక్‌ తమ యూజర్ల అనుమతి లేకుండా వారి వ్యక్తిగత సమాచారాన్ని సేకరించిందని, వారికి తెలుపకుండా ఆ సమాచారాన్ని ఎలా వినియోగిస్తుందని స్పానిష్‌ ఏజెన్సీ ఓ ప్రకటనలో ప్రశ్నించింది. ఫేస్‌బుక్‌ ప్రైవసీ పాలసీ నిర్థిష్టంగా లేదని, అస్పష్ట నిబంధనలతో కూడిఉందని ఇది, యూజర్ల సమాచార సేకరణకు తగిన విధంగా లేదని మండిపడింది.
 
తమ దేశ సమాచార పరిరక్షణ నిబంధలను ఉల్లంఘించినందుకు, ఇతర ఉల్లంఘనలకు పాల్పడినందుకు ఫేస్‌బుక్‌కు జరిమానా విధించినట్టు వెల్లడించింది.ఫేస్‌బుక్‌కు గతంలో ఫ్రాన్స్‌కు చెందిన డేటా ఏజెన్సీ కూడా తమ యూజర్ల డేటాను కాపాడటంలో విఫలమైందని 1,50,000 యూరోల జరిమానా విధించింది.