సౌతాఫ్రికాలో జరుగుతున్న కామన్ వెల్త్ క్రీడల్లో మంగళగిరి యువతి చంద్రిక వెయిట్ లిఫ్టింగ్‌లో స్వర్ణం సాధించడంపై స్థానికులు హర్షం వ్యక్తం చేస్తున్నారు. నిరుపేద కుటుంబానికి చెందిన చంద్రిక తల్లిదండ్రులు చిన్నతనంలోనే మృతి చెందగా.. అమ్మమ్మ దగ్గరే పెరుగుతోంది. చదువుతోపాటూ, వెయిట్ లిఫ్టింగ్‌లో కూడా ఆసక్తి పెంచుకున్న చంద్రిక అందులో మంచి క్రీడాకారిణిగా గుర్తింపు తెచ్చుకుంది. చంద్రికకు పోషకాహారం అందించే స్తోమత లేకపోయినా.. క్రీడల్లో రాణించిందని ఆమె అమ్మమ్మ తెలిపారు. తగిన ప్రోత్సాహం అందిస్తే దేశానికి మరిన్ని పతకాలు తెచ్చిపెడుతుందన్నారు.  ముఖ్యమంత్రి చంద్రిక కష్టాన్ని గుర్తించి ప్రభుత్వ ఉద్యోగం ఇప్పించాలని కోరారు. ఈనెల 19న సౌతాఫ్రికా నుంచి మంగళగిరి వస్తున్న చంద్రికకు భారీ ర్యాలీతో స్వాగతం పలికేందుకు, ఘనంగా సన్మానించేందుకు స్థానికులు ఏర్పాట్లు చేస్తున్నారు.