రియాద్‌: మినిస్ట్రీ ఆఫ్‌ మునిసిపల్‌ మరియు రూరల్‌ ఎఫైర్స్‌ ఇటీవల ఓ వర్క్‌ షాప్‌ని నిర్వహించింది. వర్షాలు, వరదల కారణంగా తలెత్తే ఎలాంటి పరిస్థితినైనా ఎదుర్కొనేందుకు వీలుగా ఈ వర్క్‌షాప్‌లో పలు కీలక నిర్ణయాలు తీసుకున్నారు. రానున్నది వర్షాకాలం కావడంతో ఈ వర్క్‌షాప్‌ని నిర్వహించారు. డిపార్ట్‌మెంట్‌ ఆఫ్‌ ఆపరేషన్స్‌ మరియు మెయిన్‌టెనెన్స్‌ - రియాద్‌ గవర్నరేట్‌ నిర్వహించిన ఈ వర్క్‌షాప్‌లో, ఫ్లడ్‌ ఎమర్జన్సీ ప్లాన్‌, రియాద్‌లో వినియోగిస్తోన్న 'హజిర్‌' యాప్‌, మీడియాతో కలిసి పనిచేయడం, డిజాస్టర్స్‌ పట్ల ప్రజల్లో అవగాహన పెంచడం వంటి అంశాల గురించి చర్చించారు. హజిర్‌ యాప్‌ ద్వారా ఎప్పటికప్పుడు వాతావరణ సమాచారాన్నీ, అలాగే వరదలకు సంబంధించిన హెచ్చరికల్ని జారీ చేసి ప్రజల్ని అప్రమత్తం చేస్తారు. అత్యవసర పరిస్థితుల నేపథ్యంలో తలెత్తే సమస్యల్ని ఎదుర్కోవడంతోపాటుగా, బాధితులకు ఆహారం, మంచి నీరు అందించేందుకు పక్కా వ్యూహాల్ని ముందుగా సిద్ధం చేసేలా వర్క్‌షాప్‌లో చర్చించారు.