మనామా: హమాలా లోని ఓ ఇంటి నుంచి నగదుని, అలాగే ఖరీదైన వాచ్‌లను దొంగిలించిన కేసులో ఓ వ్యక్తిని అరెస్ట్‌ చేశారు. నార్తరన్‌ గవర్నరేట్‌ పోలీస్‌ జనరల్‌ డైరెక్టర్‌ ఈ విషయాన్ని వెల్లడించారు. దొంగతనానికి గురైన నగదు, ఖరీదైన వాచ్‌ల విలువ మొత్తం 65,000 బహ్రెయిన్‌ దినార్స్‌ ఉంటుంది. జనరల్‌ డైరెక్టర్‌ మాట్లాడుతూ, నిందితుడు దొంగతనం చేసే క్రమంలో సెక్యూరిటీ గార్డ్‌పై దాడి చేశాడనీ, ఆ దాడిలో సెక్యూరిటీ గార్డ్‌ గాయాలపాలయ్యాడని తెలిపారు. నిందితుడ్ని గుర్తు చేసి అరెస్ట్‌ చేశామనీ, దొంగిలించిన వస్తువుల్లో కొన్ని స్వాధీనం చేసుకున్నామని పోలీసులు వెల్లడించారు.