అమెరికాలో మరోసారి కాల్పులు కలకలం సృష్టించాయి. లాస్ వెగాస్ ఘటన మరువక ముందే.. వర్జీనియా స్టేట్ యూనివర్సిటీలో కాల్పుల ఘటన వెలుగు చూసింది. అమెరికా కాలమానం ప్రకారం రాత్రి 8 గంటల 25 నిమిషాల సమయంలో  ఓ దుండగుడు యూనివర్సిటీ క్యాంపస్ లోకి చొరబడి కాల్పులకు దిగాడు. ఈ ఘటనలో ఒకరికి గాయాలు అయ్యాయి. 

మరోవైపు వెంటనే సంఘటనా స్థలానికి చేరుకున్న పోలీసులు..  కాల్పుల ఘటనలో గాయపడిన వ్యక్తిని ఆస్పత్రికి తరలించారు. అతనికి  ప్రాణాపాయం లేదని తెలిపారు. కాల్పులు జరిగిన వెంటనే పోలీసులు క్యాంపస్ మొత్తాన్ని స్వాధీనంలోకి తీసుకున్నారు. యూనివర్సిటీ గేట్లన్నీ మూసేశారు. కాల్పులు జరిగిన ప్రదేశం చుట్టుపక్కల అందర్నీ ఖాళీ చేయించారు. అటువైపు ఎవరూ రావొద్దని సామాజిక మాధ్యమాల ద్వారా హెచ్చరికలు చేశారు. కాల్పులు జరిపిన వ్యక్తి కోసం పోలీసులు గాలింపు చర్యలు చేపట్టారు.