ప్రముఖ పుణ్యక్షేత్రమైన కర్నూలు జిల్లా మంత్రాలయం రాఘవేంద్రస్వామిని ప్రముఖ సినీనటుడురజనీకాంత్‌ మంగళవారం ఉదయం దర్శించుకున్నారు. ఆయన నటించిన 2.0 సినిమా విడుదల కానున్న నేపథ్యంలో స్వామిని దర్శించుకున్నట్లు సమాచారం. ముందుగా తుంగభద్ర నదిలో పుణ్యస్నానం ఆచరించిన ఆయన గ్రామదేవత మంచాలమ్మను, రాఘవేంద్రస్వామి మూల బృందావనాన్ని దర్శించుకున్నారు. పీఠాధిపతి సుబుదీంద్ర తీర్థులను కలిసి కొద్దిసేపు మాట్లాడి ఆశీర్వాదం పొందారు. ఆయన మంత్రాలయానికి వస్తున్నట్లు ముందస్తు సమాచారం ఇవ్వకుండా నేరుగా మఠానికి చేరుకున్నారు. స్నానం చేసేందుకు తుంగభద్రనదికి వెళ్తున్న సమయంలో కొందరు భక్తులు చూడగా తమిళనాడు మంత్రి అని చెప్పి అధికారులు వారిని పంపేశారు. అనంతరం మఠానికి చేరుకోగానే గుర్తించిన భక్తులు ఆయనతో ఫోటోలు తీసుకునేందుకు, కరచాలనం చేసేందుకు పోటీలు పడ్డారు. రజనీకాంత్‌ రాకతో మఠంలో సందడి నెలకొంది.