ఆర్థిక వ్యవహారాలకు సంబంధించి వ్యక్తిగత మేనేజర్‌పై హత్యాయత్నం చేసిన ప్రముఖ నటుడు వినోద్ కుమార్‌ను కర్ణాటక పోలీసులు అదుపులోకి తీసుకున్నట్టు తెలిసింది. గత కొన్నేళ్లుగా నటుడు వినోద్ కుమార్‌కు వ్యక్తిగత మేనేజర్‌గా సచ్చిదానంద కొనసాగేవారు. వినోద్ కుమార్‌కు సంబంధించిన ఆర్థిక వ్యవహారాల్లో గోల్‌మాల్ జరిగిందనే ఆరోపణలు వినిపిస్తున్నాయి. ఈ నేపథ్యంలోనే వినోద్ కుమార్.. మేనేజర్ సచ్చిదానందపై హత్యాయత్నానికి సిద్ధమైనట్టు ఆరోపణలు ఉన్నాయి. సచ్చిదానంద పుత్తూరు పరిధిలోని సంప్య పోలీస్ స్టేషన్‌లో ఫిర్యాదు చేశారు. విచారణ జరిపిన పోలీసులు దాడికి యత్నించిన విషయం వాస్తవమని గుర్తించినట్లు తెలుస్తోంది. వినోద్ కుమార్ స్వగ్రామమైన దక్షిణ కన్నడ జిల్లా పుత్తూరు తాలూకా ఈశ్వర మంగలలో నటుడిని అరెస్ట్ చేసి తరలించారు. వినోద్ కుమార్ కన్నడ, తెలుగు, తమిళ భాషలలో నటుడిగా గుర్తింపు పొందారు.