ఒమాన్  లోని మస్కట్ లో ఒక మాదిరిగాను, సోహార్లో కొన్ని  ప్రాంతాలలో భారీగాను వర్షాలు పడినట్టు తెలియవచ్చింది. వాతావరణం ఇంకా మేఘావృతమయే ఉందనీ, రానున్న కొద్ది గంటల పాటు కూడా వర్షాలు పడతాయని ఇక్కడి ప్రజలు చెపుతున్నారు.  నేటి నుండి ఈ వారాంతం వరకు, ఒమాన్ ఉత్తర ప్రాంతాలలో వర్షాలు పడతాయని, ఒమాన్ తీరప్రాంతాల వెంబడి 15 నుండి 25 నాట్ల వేగంతో వీయనున్న వాయువ్య పవనాలు,  ఈ శనివారం వరకు సముద్రంపై ఒక మాదిరి నుండి తీవ్ర ప్రభావం చూపిస్తాయని వారు విశ్లేషించారు. అంతే కాకుండా శీతాకాలం వస్తోందనడానికి సూచనగా, ఉష్ణోగ్రతలు కూడా తగ్గుతున్నాయని వారు వెల్లడించారు.