యూఏఈ ప్రైమ్‌ మినిస్టర్‌, వైస్‌ ప్రెసిడెంట్‌, దుబాయ్‌ రూలర్‌ షేక్‌ మొహమ్మద్‌ బిన్‌ రషీద్‌ అల్‌ మక్తౌమ్‌, అంతర్జాతీయ మహిళా దినోత్సవాన్ని పురస్కరించుకుని, మహిళలకు సందేశాన్నిచ్చారు. మార్చి 8వ తేదీ ఓ అద్భుతమైన మరియు ప్రత్యేకమైన రోజనీ, ఆ రోజున ప్రపంచ వ్యాప్తంగా మహిళలు ఆనందోత్సాహాలతో సంబరాలు చేసుకుంటారనీ, యూఏఈలోనూ మహిళలు ఈ రోజున ప్రత్యేకంగా సంబరాలు జరుపుకుంటారని అన్నారు. మహిళలు అన్ని రంగాల్లోనూ రాణించాల్సి వుందనీ, మహిళా దినోత్సవం నాడు మాత్రమే కాక, ఏడాదిలో అన్ని రోజుల్లోనూ మహిళలు ఆనందంగా ఉండాలని ఆకాంక్షించారాయన. తన టీమ్‌లో 70 శాతం మంది మహిళలే వున్నారని షేక్‌ మొహమ్మద్‌ గుర్తు చేశారు. ప్రతిరోజూ వారు ఎంతో నిబద్ధతో పనిచేస్తారనీ, ప్రతి మినిస్టర్‌, అలాగే గవర్నమెంట్‌ అఫీషియల్‌ మహిళల సేవల్ని కొనియాడాల్సి ఉంటుందని, యూఏఈ అభివృద్ధిలో మహిళల పాత్ర మరువలేమని ఆయన చెప్పారు.