బీజింగ్‌ : చైనా ఈ-కామర్స్‌ దిగ్గజం అలీబాబా గ్రూప్‌ భారీగా ఉద్యోగావకాశాలను కల్పించింది. వ్యాపార విస్తరణలో భాగంగా భవిష్యత్తులో మరిన్ని అవకాశాలు కల్పించనుంది. తాజా నివేదికల ప్రకారం 2017 సంవత్సరంలో 3.68 కోట్ల ఉద్యోగాలు కల్పించినట్టు ఓ సర్వే ద్వారా వెల్లడైంది.  అలీబాబా గ్రూప్‌ నిర్వహిస్తున్న వివిధ సంస్థల ద్వారా 50కోట్ల వినియోగదారులకు సేవలందిస్తుందని,  అన్‌లైన్‌ రిటైల్‌ విభాగంలోనే కొత్తగా 1.4 కోట్ల ఉద్యోగాలను కల్పించినట్టు పేర్కొంది. ముఖ్యంగా టెక్స్‌టైల్స్‌, నిత్యవసరాలు, గృహోపకరణాల విభాగాలు ఈ నియామకాల్లో అగ్రభాగాన ఉన్నాయని తెలిపింది.

ఆర్‌ అండ్‌ డీ, డిజైన్‌, తయారీ, లాజిస్టిక్స్‌ రంగాల్లోని నిపుణలకు డిమాండ్‌ పెరగడానికి అన్‌లైన్‌ రిటైల్‌ సేవల విస్తరణ ఎంతగానో దోహదపడినట్టు, కేవలం ఈ రంగాల్లోనే 2.27 కోట్ల ఉద్యోగాలు కల్పించగలిగారని నివేదించింది. గత ఏడాదితో పోల్చితే 2017 నాలుగో త్రైమాసికంలో ఆదాయంలో 56 శాతం వృద్ధి సాధించినట్టు అలీబాబా గ్రూప్‌ పేర్కొంది. భవిష్యత్తులో ఈ కామర్స్‌ రంగం మరింత కీలకంగా మారనున్నట్టు వెల్లడించింది. వ్యాపార విధానాలను సంస్కరించడం, అఫ్‌లైన్‌ రిటైల్‌ వ్యాపారాన్ని డిజిటల్‌ టెక్నాలజీతో అనుసంధానించడం ద్వారా అద్భుతమైన ఫలితాలు సాధించవచ్చని ఈ రిపోర్ట్‌ తెలిపింది.