అమెరికా:ఉత్తర అమెరికా తెలుగు సంఘం(తానా) తెలుగు సంస్కృతి, సంప్రదాయాలను కాపాడేందుకు తన వంతుగా సేవలందిస్తోంది. 1977 లో ఏర్పాటైన తానా ఇప్పటికీ లాభాపేక్షలేని సంస్థగా తెలుగు వారికి విశేషంగా సాయపడుతోంది. ఇప్పుడు ఆ సంస్థ అమెరికాలో చదివే తెలుగు విద్యార్థుల కోసం స్కాలర్‌షిప్‌లను అందిస్తోంది. 2018-19 ఏడాదికి గాను.. డిగ్రీ చదువుకునే విద్యార్థుల కోసం దరఖాస్తులను ఆహ్వానిస్తోంది. చదువుకునే సామర్థ్యం ఉండి.. ఆర్థిక స్థోమత లేని వారికి అందులోను అమెరికాలో విద్యాభాస్యం చేసేందుకు దరఖాస్తులను కోరుతోంది. మొత్తం ఏడు రకాల గ్రాడ్యుయేట్ స్కాలర్‌షిప్‌లను అందించనుంది తానా. తానా ఫౌండేషన్ గ్రాడ్యుయేట్ స్కాలర్‌షిప్‌ల పేరుతో ప్రతి ఒక్క విద్యార్థికి 2000 డాలర్లను అందించనుంది. తెలంగాణ, ఆంధ్రప్రదేశ్‌లలో ఉంటున్న తెలుగువారు ఎవరైనా ఈ స్కాలర్‌షిప్‌లను పొందవచ్చు. ఉన్నత చదువుల కోసం అమెరికాకు వెళ్లే విద్యార్థులు ఎవరైనా ఈ అవకాశాన్ని ఉపయోగించుకునే వెసులుబాటు ఉంది. సెమిస్టర్ ప్రకారం ఒక్కో సెమిస్టర్‌కు 500 డాలర్ల చొప్పున నాలుగు సెమిస్టర్లకు వీటిని అందించనున్నారు.

గతంలో విద్యార్థులు చదువుకున్న విద్యను విజయవంతంగా పూర్తి చేసిన వారు మాత్రమే తానా స్కాలర్‌షిప్‌ అందుకునేందుకు అర్హులు. అంతే కాదు.. నాలుగు యూత్ స్కాలర్‌షిప్‌లను అందించనుంది తానా. ఉత్తర అమెరికాలో హైస్కూలు విద్యను పూర్తి చేసుకుని కాలేజి చదువులకు వెళ్లే విద్యార్థులకు నాలుగు రకాల యూత్ స్కాలర్‌షిప్‌లను అందించనుంది.

ఒక్కోక్కరికి 1000 డాలర్లను ఇవ్వనుంది. తానా ఫౌండేషన్‌ అర్హులైన వారు దరఖాస్తు చేసుకోవచ్చని సూచించింది. మరిన్ని వివరాలకు తానా ఫౌండేషన్‌ ఛైర్మన్‌ నిరంజన్‌ శృంగవరపు(248-342-6872)ను సంప్రదించవచ్చు.