ఒమన్‌లో వాతావరణం చల్లబడింది. చలి తీవ్రత పెరగడంతో ప్రతి ఒక్కరూ వెచ్చదనం కోసం వివిధ మార్గాల్ని అన్వేషిస్తున్నారు. ప్రధానంగా ఇంట్లో సరైన ఏర్పాట్లు లేకుండా 'వేడి' చేసుకునేందుకు ప్రయత్నిస్తుండడం ప్రమాదాలకు కారణమవుతోంది. బార్బిక్యూ వంటి తాత్కాలిక ఏర్పాట్లు, ఆ సమయంలో వహించే అజాగ్రత్తతో అగ్ని ప్రమాదాలు సంభవిస్తున్నట్లు పబ్లిక్‌ అథారిటీ ఫర్‌ సివిల్‌ డిఫెన్స్‌ సీనియర్‌ అధికారి చెప్పారు. అగ్ని ప్రమాదాలకు సంబంధించి తరచూ అనేక ఘటనలు తమ దృష్టికి వస్తున్నాయని ఆయన అన్నారు. ఇంటిని వేడిగా ఉంచేందుకు వినియోగించే ఎలక్ట్రిక్‌ పరికరాల పట్ల వహించే అజాగ్రత్త కూడా ప్రమాదాలకు కారణమని ఆయన చెప్పారు. 2014లో సుమారు 3335 ఘటనలు చోటుచేసుకోగా, వీటిలో 23 శాతం ఇంట్లో ఏర్పాట్ల వల్లే జరిగినట్లు తేలింది. మొత్తం 755 ఇళ్ళు గత ఏడాది దగ్ధం అయ్యాయి. వాటర్‌ హీటర్స్‌ వాడేటప్పుడు నాణ్యతగలవాటి కోసం చూడాలని వినియోగదారులకు అధికారులు సూచించారు. ఇంట్లోని ఎలక్ట్రిక్‌ వస్తువులను ఎప్పటికప్పుడు నిపుణులతో తనిఖీ చేయిస్తే ప్రమాదాలు తగ్గుతాయని వారు చెప్పారు.