జకార్తా: ఇండోనేషియా ఉత్తర తీరంలో భారీ భూకంపం సంభవించింది. రిక్టర్ స్కేలుపై భూకంప తీవ్రత 7.0గా నమోదైంది. ఇండోనేషియాకు చెందిన లాంబోక్ దీవిలో భూకంప కేంద్రం ఉన్నట్లు అమెరికా జియోలాజికల్ సర్వే వెల్లడించింది. 15 కిలోమీటర్ల లోతులో భూకంప కేంద్ర ఉంది. దీంతో ఇండోనేషియా విపత్తు నిర్వహణ అధికారులు సునామీ హెచ్చరికలు జారీ చేశారు. వారం కిందట కూడా ఇదే దీవిలో భూకంపం సంభవించగా 17 మంది మరణించారు. ఇప్పుడు వచ్చిన భూకంపం దాని కంటే కూడా ఎక్కువేనని అధికారులు తెలిపారు. ఇండోనేషియాతోపాటు చుట్టుపక్కల దేశాల్లోనూ ప్రకంపనలు వచ్చాయి. వెయ్యి కిలోమీటర్ల దూరంలో ఉండే బాలిలోనూ భూమి కంపించింది. స్థానిక కాలమానం ప్రకారం రాత్రి 7.30 గంటల సమయంలో భూకంపం సంభవించింది.