లాస్‌ఏంజిల్స్‌ : కాలిఫోర్నియాలోని శాంటా అనా నగరంలో విమానం కూలిపోవడంతో ఐదుగురు మృతి చెందినట్లు అధికారులు తెలిపారు. రెండు ఇంజిన్‌లు కలిగిన విమానం కూలిపోయిన ఘటన ఆదివారం సౌత్‌కోస్ట్‌ ప్లాజా షాపింగ్‌ సెంటర్‌ సమీపంలో జరిగినట్లు అగ్నిమాపక అధికారులు వెల్లడించారు. సాన్‌ ఫ్రాన్సిస్కో కంపెనీ పేరుతో రిజిష్టరైన ఈ విమానం పార్కింగ్‌ స్థలంలో అత్యవసరంగా ల్యాండ్‌ అవుతుండగా కుప్పకూలినట్లు ఎఫ్‌ఎఎ అధికారులు ప్రకటించారు. దీంతో ఐదుగురు మృతి చెందగా, ఎంతమంది ప్రయాణికులు గాయపడ్డారన్న సమాచారం స్పష్టత లేదని అధికారులు పేర్కొన్నారు. ఈ ప్రమాదంపై విచారణకు ఆదేశించినట్లు ఫెడరల్‌ ఏవియేషన్‌ అడ్మినిస్ట్రేషన్‌ (ఎఫ్‌ఎఎ) అధికారులు ప్రకటించారు.