హైదరాబాద్‌లో అర్ధరాత్రి నిర్వహించిన డ్రంకెన్‌ డ్రైవ్‌ తనిఖీల్లో ముగ్గురు యువతులు రెచ్చిపోయారు. మద్యం సేవించి వాహనం నడుపుతూ పట్టుబడ్డారు. బ్రీత్‌ అనలైజర్‌ టెస్ట్‌కు సహకరించకుండా ట్రాఫిక్‌ పోలీసులను ముప్పు తిప్పలు పెట్టారు. ఈ దృశ్యాలను చిత్రీకరిస్తున్న మీడియాపైనా చిందులు వేశారు.

వెస్ట్‌జోన్‌ పరిధిలోని జూబ్లీహిల్స్‌, బంజారాహిల్స్‌ సహా ఆరు ప్రాంతాల్లో ట్రాఫిక్ పోలీసులు డ్రంకెన్‌ డ్రైవ్‌ తనిఖీలు చేపట్టారు. ఈ క్రమంలో ముగ్గురు యువతులు ట్రాఫిక్‌ పోలీసులతో వాగ్వాదానికి దిగారు. బ్రీత్‌ అనలైజర్‌ టెస్ట్‌కు సహకరించకుండా… కొద్దిసేపు నడిరోడ్డుపై హల్‌చల్‌ చేశారు. మద్యం మత్తులో పోలీసులను బూతులు తిడుతూ రెచ్చిపోయారు. చివరకు ఎలాగోలా బ్రీత్‌ అనలైజర్‌ టెస్ట్‌ నిర్వహించిన పోలీసులు… ముగ్గురు యువతులు మద్యం సేవించినట్లు నిర్ధారించారు. వీరిలో ఓ అమ్మాయికి ఏకంగా 192 పాయింట్లు రావడంతో… ఖాకీలే షాకయ్యారు. వారిపై కేసు నమోదు చేసి వాహనాన్ని స్వాధీనం చేసుకున్నారు.

వెస్ట్‌జోన్‌ పరిధిలోని ఆరు ప్రాంతాల్లో డ్రంకెన్‌ డ్రైవ్‌ తనిఖీలు చేపట్టిన పోలీసులు… మద్యం తాగి వాహనాలు నడుపుతున్న 30 మందిపై కేసులు నమోదు చేశారు. 20 కార్లతో పాటు 10 టూవీలర్స్‌ స్వాధీనం చేసుకుని పోలీస్‌ స్టేషన్‌కు తరలించారు.