కారులో ఇరుక్కున్న చిన్నారిని అబుదాబీ పోలీసులు రక్షించారు. యాస్‌ ఐలాండ్‌లోని బందర్‌ ప్రాంతంలో ఓ ఎస్‌యూవీ వాహనంలో చిన్నారిని పోలీసులు గుర్తించారు. ఆ కారు లో చిన్నారి ఇరుక్కుపోగా, తక్షణం స్పందించిన పోలీసులు అత్యంత జాగ్రత్తగా ఆ చిన్నారిని ప్రమాదం నుంచి కాపాడారు. చిన్న పిల్లల్ని ఎట్టి పరిస్థితుల్లోనూ కార్లలో ఒంటరిగా విడిచిపెట్టకూడదని తల్లిదండ్రులకు ఈ సందర్భంగా పోలీసులు విజ్ఞప్తి చేశారు. కార్లలో చిన్న పిల్లల్ని విడిచిపెడితే, తీవ్రమైన సమస్యలు ఎదురవుతాయనీ, ఆక్సిజన్‌ అందక ప్రాణాలు కోల్పోయే అవకాశం వుంటుందనీ, అత్యధిక ఉష్ణోగ్రతలతో డీహైడ్రేషన్‌ సమస్య తలెత్తుతుందని పోలీసులు వివరించారు. బాధితురాలి తండ్రి, తమ చిన్నారిని కాపాడిన పోలీసులకు కృతజ్ఞతలు తెలిపారు.