దుబాయ్:ఆసియాకి చెందిన నలుగురు సభ్యుల ముఠాని పోలీసులు అరెస్ట్‌ చేశారు. జబెల్‌ అలి, కుసైస్‌ ఇండస్ట్రియల్‌ ప్రాంతాల్లో వీరు తరచూ దొంగతనాలకి పాల్పడుతున్నట్లు పోలీసులు తెలిపారు. వరుస దొంగతనాల గురించిన ఫిర్యాదులు అందడంతో పోలీసులు, అత్యంత వ్యూహాత్మకంగా వ్యవహరించి నిందితుల్ని అరెస్ట్‌ చేశారు. కారు బ్యాటరీల్ని వీరు దొంగిలిస్తున్నట్లు పోలీసులు తేల్చారు. కార్ల నుంచి బ్యాటరీలను దొంగిలించి, వాటిని సగం ధరకే విక్రయిస్తుంటామని నిందితులు విచారణలో అంగీకరించారు. వరుస దొంగతనాల నేపథ్యంలో క్రైమ్‌ ప్రివెన్షన్‌ డిపార్ట్‌మెంట్‌ని అలర్ట్‌ చేయడంతో, నిందుతల్ని పట్టుకోగలిగినట్లు పబ్లిక్‌ అండ్‌ క్రిమినల్‌ ఇన్వెస్టిగేషన్‌ - దుబాయ్‌ పోలీస్‌ డిప్యూటీ డైరెక్టర్‌ బ్రిగేడియర్‌ మొహమ్మద్‌ రషీద్‌ బిన్‌ సారి చెప్పారు.