బీజింగ్‌: చైనాలో తొలిసారిగా ఓ ప్రైవేట్‌ సంస్థ చేపట్టిన రాకెట్‌ ప్రయోగం విఫలమైంది. బీజింగ్‌కు చెందిన లాండ్‌స్పేస్‌ అనే సంస్థ అంతరిక్షంలోకి రాకెట్‌ను పంపించేందుకు అన్ని ఏర్పాట్లు చేసింది. ఈ రాకెట్‌ ద్వారా చైనాకు చెందిన సీసీటీవీ ప్రసారాల కోసం ఓ ఉపగ్రహాన్ని నిర్దేశిత కక్ష్యలోకి ప్రవేశపెట్టాలనుకుంది.

శనివారం రాత్రి ఝూక్యూ-1 రాకెట్‌ ప్రయోగాన్ని ఆ సంస్థ చేపట్టింది. అయితే రాకెట్‌ మొదటి రెండు దశల్లో సవ్యంగానే వెళ్లగా.. మూడో దశలో విఫలమైనట్లు ఆ సంస్థ ప్రతినిధులు తెలిపారు. చైనాలో ఓ ప్రైవేట్‌ సంస్థ చేపట్టిన మూడు దశల తొలి వాణిజ్య రాకెట్‌ ప్రయోగమిదే. 19 మీటర్ల పొడవున్న ఈ రాకెట్‌ ప్రయోగాన్ని శనివారం గన్సు ప్రాంతంలోని జియుకాన్‌ శాటిలైట్‌ లాంచ్‌ సెంటర్‌ నుంచి ప్రయోగించారు. ఈ ప్రయోగంపై లాండ్‌స్పేస్‌ కంపెనీ స్పందిస్తూ.. రెండో దశ అనంతరం అసాధారణ పరిస్థితులు తలెత్తి ప్రయోగం విఫలమైందని పేర్కొంది.