ఫిల్మ్ అండ్ టెలివిజన్ ఇన్‌స్టిట్యూట్ ఆఫ్ ఇండియా (ఎఫ్‌టీఐఐ) చైర్మన్ పదవికి ప్రముఖ బాలీవుడ్ నటుడు అనుపమ్ ఖేర్ బుధవారంనాడు రాజీనామా చేశారు. అంతర్జాతీయ టెలివిజన్ షోతో సహా తనకున్న బిజీ కమిట్‌మెంట్ల కారణంగా చైర్మన్ పదవికి రాజీనామా చేస్తున్నట్టు ఆయన ఓ ట్వీట్‌లో పేర్కొన్నారు. 'ప్రతిష్ఠాత్మక ఎఫ్‌టీఐఐ చైర్మన్‌గా పనిచేయడం ఒక గొప్ప గౌరవంగా భావిస్తున్నారు. ఎంతో గొప్పు అనుభవం సంపాదించే అవకాశం దొరికింది. అయితే అంతర్జాతీయ కమిట్‌మెంట్లు ఉండటంతో తగిన సమయాన్ని సంస్థకు కేటాయించలేకపోతున్నాను. ఆ కారణంగానే రాజీనామా చేయాలని నిర్ణయించుకున్నాను. అంధరికీ ధన్యవాదాలు' అని ఆ ట్వీట్‌లో అనుపమ్ ఖేర్ పేర్కొన్నారు. కాగా, సంస్థను సక్రమంగా నిర్వహించలేకపోతున్నారంటూ విద్యార్థుల నుంచి విమర్శల దుమారం రేగడంతో గజేంద్ర చౌహాన్ స్థానంలో 2017 అక్టోబర్ 11న ఎఫ్‌టీఐఐ కొత్త చైర్మన్‌గా అనుపమ్ ఖేర్‌ను నియమించారు.