నాలుగేళ్ళ ఎమిరేటీ చిన్నారి వాషింగ్‌మెషీన్‌లో ఇరుక్కుని ప్రాణాలు కోల్పోయిన ఘటన అజ్మన్‌లో చోటు చేసుకుంది. అజ్మన్‌లోని అల్‌ రావ్దా ప్రాంతంలోగల ఓ విల్లాలో ఈ ప్రమాదం జరిగింది. ఇంట్లో గ్రాండ్‌ మదర్‌తో వుంటోన్న సమయంలో ఆ చిన్నారి, లాండ్రీ రూమ్‌లోకి వెళ్ళి, ఫ్రంట్‌లోడర్‌ అయిన వాషింగ్‌ మెషీన్‌లోకి దూరి, డోర్‌ క్లోజ్‌ చేసుకున్నాడు. మెషీన్‌ ఆటోమేటిక్‌గా హాట్‌ వాటర్‌తో నిండి, వాషింగ్‌ సైకిల్‌ కూడా ప్రారంభమయ్యింది. ఈ క్రమంలో బాలుడు దుర్మరణం చెందాడని పోలీసులు నిర్ధారించారు. ఆసుపత్రి నుంచి అందిన సమాచారంతో తాము కేసుని రిజిస్టర్‌ చేశామని చెప్పారు. వాషింగ్‌మెషీన్‌ని పగలగొట్టి, బాలుడ్ని అతడి అంకుల్‌ బయటకు తీశారు. ఇలాంటి హృదయ విదారక ఘటనలు తీవ్రంగా కలచివేస్తాయనీ, గార్డియన్స్‌ అలాగే పేరెంట్స్‌ తమ పిల్లల సంరక్షణ విషయంలో తగిన జాగ్రత్తలు తీసుకోవాలని అల్‌ హమైదియా పోలీస్‌ స్టేషన్‌ డైరెక్టర్‌ లెఫ్టినెంట్‌ కల్నల్‌ యాహ్యా ఖలాఫ్‌ అల్‌ మత్రోషి విజ్ఞప్తి చేశారు.