ఊర్లో ఊరికే కాలం గడిపేసే ఏ కుర్రాడికైనా వాడ్ని చూసి నేర్చుకో.. వీడ్ని చూసి నేర్చుకో.. లాంటి మాటలు వినపడటం మామూలే. వరాలబాబుదీ అదే పరిస్థితి. అయితే ఈ కుర్రాడికి ఆ మాట నచ్చలేదు సరికదా 'నన్ను చూసి ఎవడైనా నేర్చుకునేలా మారి చూపిస్తా 'అని తండ్రితో శబదం చేసి మరీ సిటీకొచ్చాడు. కుర్రాడు కదా కాస్త దూకుడెక్కువ. ఆ దూకుడుతోనే వచ్చీ రాగానే చిలక లాంటి ఓ పాపని చూడటంతో మనోడిలో నరాల్లో కరెంట్ పాసయ్యి దిల్ 'గరమ్' అయ్యింది. అక్కడినుండి వరాలబ్బాయి కథ ఎటు మళ్ళింది అన్నది తెరమీదే చూడాలంటున్నారు ఆది. ఆయన హీరోగా మదన్ తెరకెక్కించ చిత్రం 'గరమ్'. ఆదాశర్మ హీరోయిన్ గా నటించిన ఈ సినిమాని శ్రీనివాసాయి స్క్రీన్స్ పతాకంపై పి.సురేఖ నిర్మించారు. ఆది పుట్టినరోజు సందర్భంగా నిన్న (డిసెంబర్ 23న) హైదరాబాద్‌లో గరమ్ సినిమా పాటలను విడుదల చేశారు. హీరో గోపీచంద్ ఆడియో విడుదల చేసి చిత్ర బృందానికి శుభాకాంక్షలు తెలిపారు. ఈ కార్యక్రమంలో రాజ్ తరుణ్, రానా, సందీప్ కిషన్, నిఖిల్, రకుల్ ప్రీత్ తదితరులు పాల్గొన్నారు