రస్‌ అల్‌ ఖైమాలో ఈద్‌ అల్‌ ఫితర్‌ రోజు రాత్రి జరిగిన హిట్‌ అండ్‌ రన్‌ ప్రమాదంలో ఓ ఒమనీ పౌరుడు మృతి చెందారు. మృతుడి వయసు 50 సంవత్సరాలుగా పోలీసులు నిర్ధారించారు. మామురా పోలీస్‌ స్టేషన్‌ చీఫ్‌ కల్నల్‌ వలీద్‌ మాట్లాడుతూ, ప్రమాదానికి కారణమైన వాహనాన్ని నడుపుతున్న వ్యక్తి 16 ఏళ్ళ వయసు యువకుడనీ, అతను జీసీసీ జాతీయుడనీ చెప్పారు. నిందితుడికి లైసెన్స్‌ కూడా లేదని అధికారులు పేర్కొన్నారు. సంఘటన గురించిన సమాచారం అందుకోగానే, బాధితుడ్ని రక్షించేందుకు ప్రయత్నించామనీ, ఆసుపత్రికి తరలించగా అక్కడ అతను ప్రాణాలు కోల్పోయినట్లు వైద్యులు చెప్పారని పోలీసులు వివరించారు. ఘటనపై కేసు నమోదు చేసి, విచారణ జరుపుతున్నట్లు రస్‌ అల్‌ ఖైమా పోలీసులు తెలిపారు.