ఎమిరేట్స్‌ రోడ్డుపై మూడు కొత్త రాడార్లను ఏర్పాటు చేశారు. అతి వేగంతో ప్రయాణించే వాహనాల్ని గుర్తించడంతోపాటు, వాహనదారుల సేఫ్టీని దృష్టిలో పెట్టుకుని వీటిని ఏర్పాటు చేసినట్లు అధికారులు తెలిపారు. షమాల్‌ అల్‌ రామ్‌స మీదుగా వెళ్ళే రోడ్డుపై వీటిని ఏర్పాటు చేయడం జరిగింది. రస్‌ అల్‌ ఖైమా పోలీస్‌ - సెంట్రల్‌ ఆపరేషన్స్‌ రూమ్‌ డైరెక్టర్‌ జనరల్‌ బ్రిగేడియర్‌ మొహమ్మద్‌ సయీద్‌ అల్‌ హుమైది మాట్లాడుతూ, కొత్త రోడ్డుపై స్పీడ్‌ లిమిట్‌ని గంటకు 141 కిలోమీటర్లుగా నిర్ణయించినట్లు చెప్పారు. ఆర్టియల్‌ రోడ్డుపై మరిన్ని స్పీడ్‌ కెమెరాలను ఏర్పాటు చేస్తామని ఆయన వివరించారు. ఇదిలా వుంటే, ఎమిరేట్స్‌ రోడ్డుపై గంటకు 264 కిలోమీటర్ల వేగంతో దూసుకెళ్ళిన కారుని స్పీడ్‌ కెమెరాలతో గుర్తించిన అధికారులు, వాహనాన్ని నడుపుతున్న వ్యక్తిని అరెస్ట్‌ చేశారు. రస్‌ అల్‌ ఖైమాలో జరుగుతున్న చాలా ప్రమాదాల్లో 85 శాతం అతి వేగం కారణంగా జరుగుతున్నవేనని అధికారులు వివరించారు.