ఒక్క రోజు నీరు రాకపోతే ఎన్నో ఇబ్బందులు ఎదుర్కొంటాం. నీటి వృథాతో వచ్చే కష్టాలు అన్నీ ఇన్నీ కావు. భవిష్యత్తు బాగుండాలంటే నీటిని ఆదా చేయాల్సిందే. దీన్ని గమనించిన అమెరికాలోని డెన్వర్‌కు చెందిన రషియో సంస్థ వైఫైతో నడిచే స్మార్ట్‌ స్ప్రింక్లర్ల వ్యవస్థను రూపొందించింది. ఇవి 30 శాతం నీటిని ఆదా చేయడం విశేషం. స్మార్ట్‌ఫోన్‌ సాయంతో ఈ వ్యవస్థను నియంత్రించవచ్చు. స్ప్రింక్లర్‌ వ్యవస్థను వైఫై ఇంటర్నెట్‌తో అనుసంధానిస్తారు. నియంత్రణకు సంబంధించిన యాప్‌ను ఫోన్‌లో ఇన్‌స్టాల్‌ చేస్తారు. దీంతో ఇంటి వద్దనుంచే వీటిని నియంత్రణ సాధ్యమవుతుంది. దీని సాయంతో సీజన్ల వారీగా నీటిని విడుదల చేయవచ్చు. వాతావరణాన్ని పరిశీలించి వర్షం వస్తే దానంతట అదే ఆగిపోతుంది. భూమిలో నీరు ఇంకిన శాతం గమనిస్తుంది. ఆవిరి కాగానే మళ్లీ నీటిని విడుదల చేస్తుంది. 2012లో అమెరికాలోని కొలరాడోలో వచ్చిన కరవును చూసి చలించిన ఇద్దరు సాఫ్ట్‌వేర్‌ ఇంజినీర్లు క్రిస్‌ క్లెయిన్‌, ఫ్రాన్జ్‌ గార్సోంబ్కేలు ఈ వ్యవస్థను రూపొందించారు.