దుబాయ్‌:ఇద్దరు దుబాయ్‌ పోలీసులు, దొంగిలించబడిన కారుని కేవలం గంట లోపే రికవరీ చేయగలిగారు. దుబాయ్‌ పోలీస్‌ కమాండ్‌ అండ్‌ కంట్రోల్‌ సెంటర్‌, దొంగిలించబడిన టొయోటో కారు గురించిన సమాచారాన్ని అందుకోగానే, పోలీసులు రంగంలోకి దిగారు. అల్‌ ఖుసైస్‌ పోలీస్‌, ఈ ఆపరేషన్‌ చేపట్టింది. తన కుమారుడ్ని స్కూల్‌లో దించి వస్తున్న సమయంలో తన కారుని దొంగిలించినట్లు బాధిత వ్యక్తి పోలీసులకు ఫిర్యాదు చేసినట్లు అధికారులు తెలిపారు. క్షణాల్లో కారు దొంగిలించబడిన సమాచారాన్ని పోలీస్‌ పెట్రోల్‌కి అందించగా, గంట వ్యవధిలోనే ఆ కారుని పోలీసులు పట్టుకోగలిగారు. ఇంజిన్‌ రన్నింగ్‌లో వున్న సమయంలో ఎట్టి పరిస్థితుల్లోనూ కారు దిగి, దూరంగా వెళ్ళవద్దని అధికారులు ఈ సందర్బంగా వాహనదారులకు సూచించారు.