ప్రతి నాయకుడిగా సెకండ్‌ ఇన్నింగ్స్‌ మొదలెట్టాక జగపతిబాబు కెరీర్‌ ఓ రేంజులో ఉంది. మహేష్‌బాబు, ఎన్టీఆర్‌, బాలకృష్ణ... ఇలా అగ్ర కథానాయకులతో దీటుగా నటించే అవకాశం దక్కింది. దాంతో పాటు పారితోషికాన్నీ భారీగానే అందుకొంటున్నట్టు సమాచారం. ఇక హీరోయిజం వైపుకి మనసు మళ్లే అవకాశాల్లేవు. అయితే... నిర్మాతగా మాత్రం ఓ ప్రయత్నం చేద్దామని భావిస్తున్నట్టు తెలుస్తోంది. జగపతి బ్యానర్‌పై ఇది వరకు ఎన్నో మంచి చిత్రాలొచ్చాయి. నిర్మాతగా విబి రాజేంద్రప్రసాద్‌ ఆణిముత్యాల్లాంటి చిత్రాలందించారు. గత కొన్నేళ్లుగా జగపతి బ్యానర్‌ నుంచి సినిమాలేం రాలేదు. ఓ పెద్ద విజయంతో ఆ సంస్థ కార్యకలాపాల్ని మళ్లీ ఘనంగా పునః ప్రారంభించాలని జగపతిబాబు ఆలోచిస్తున్నారట. అయితే ఆ సినిమాలో జగపతిబాబే నటిస్తారా, మరో కథానాయకుడి కోసం నిర్మిస్తారా అన్నది వేచి చూడాలి.