ప్రపంచ కుబేరుడు, మైక్రోసాఫ్ట్ అధినేత... బిల్ గేట్స్ ఆ సంస్థ నుంచి తప్పుకున్నారు. మైక్రోసాఫ్ట్ డైరెక్టర్స్ బోర్డుకు ఆయన రాజీనామా చేశారు. ఇక కేవలం ఆయన మైక్రోసాఫ్ట్ సలహాదారుగా మాత్రమే కొనసాగనున్నారు. వారెన్ బఫెట్ కంపెనీ నుంచి కూడా ఆయన తప్పుకున్నారు. ఈ విషయాన్ని ఆ సంస్థ శుక్రవారం ప్రకటించింది. తన సమయాన్ని గ్లోబల్ హెల్త్, విద్య వంటి సామాజిక సేవలకు వినియోగించే ఉద్దేశంతో ఆయన మైక్రోసాఫ్ట్ నుంచి తప్పుకున్నట్లు కంపెనీ ప్రకటించింది. ఇక పూర్తిస్థాయిలో బిల్ గేట్స్ సామాజిక కార్యక్రమాలకు తన సమయాన్ని కేటాయిస్తారని తెలిపారు.

బిల్ గేట్స్ మైక్రోసాఫ్ట్ సీఈవో సత్యనాదెళ్లకు సాంకేతిక సలహాదారుగా కొనసాగనున్నారు. 1975లో మైక్రోసాఫ్ట్ సంస్థను బిల్ గేట్స్ స్థాపించారు. సంస్థను ప్రపంచ స్థాయికి తీసుకెళ్లారు. 2000 సంవత్సరం వరకు కంపెనీ సీఈవోగా కొనసాగారు. 2014లో బిల్ గేట్స్ మైక్రోసాఫ్ట్ చైర్మన్ పదవికి రాజీనామా చేశారు. బిల్ గేట్స్ తప్పుకోవడంతో మైక్రో సాఫ్ట్ బోర్డులో 12 మంది ఉంటారు. ఈ సందర్భంగా
బిల్ గేట్స్ కలిసి పనిచేయడం గొప్ప గౌరవమని సత్యనాదెళ్ల తెలిపారు. ఆయన నుంచి తాను ఎన్నో విషయాల్ని నేర్చుకున్ననన్నారు. సాఫ్ట్ వేర్ శక్తిని ప్రజాస్వామ్యీకరించే ఉద్దేశంతో బిల్ గేట్స్ కంపెనీని స్థాపించారు. బిల్ గేట్స్ నాయకత్వం, విజన్ తో బోర్డు చాలా లాభపడిందని చెప్పారు. బిల్ గేట్స్ టెక్నికల్ పాషన్ సంస్థకు ఉపయోగపడుతుందన్నారు.

బిల్ గేట్స్ అక్టోబర్ 28, 1955 న వాషింగ్టన్ రాష్ట్రంలోని సియాటెల్‌లో ఒక ధనవంతులు కుటుంబంలో జన్మించాడు. స్కూల్లో చదవుతున్నప్పటి నుంచే బిల్ గేట్స్‌కు లెక్కలు, సైన్స్ అంటే చాలా ఇష్టం. తన మిత్రుడు పాల్ అల్లెన్‌తో కలసి కంప్యూటర్ లాంగ్యేజి అయిన బేసిక్ (BASIC) నేర్చుకొని అందులో ప్రోగ్రాములు రాయడం మొదలు పెట్టాడు. 14 ఏళ్ళ వయసులో పాల్ అల్లెన్‌తో కలసి ట్రాఫిక్ లెక్కించే ప్రాసెసర్‌కు సంబంధించిన ప్రోగ్రాములు రాసి విక్రయించాడు. అలా బిల్ గేట్స్ ప్రయాణం మొదలయ్యింది. 1995 నుండి 2006 వరకు ప్రపంచంలోనే అత్యంత ధనవంతుడిగా తన స్థానాన్ని నిలబెట్టుకున్నాడు. 2007 లెక్కల ప్రకారం బిల్ గేట్స్ ఆస్తి విలువ 58 బిలియన్ డాలర్లు. 2000 సంవత్సరంలో బిల్ గేట్స్ తన భార్యతో కలసి బిల్ & మెలిండా గేట్స్ ఫౌండేషన్ ఏర్పాటు చేశారు. దీని ద్వారా ఎయిడ్స్ నిర్మూలన, మూడవ ప్రపంచ దేశాలల్లో అంటువ్యాధుల నిర్మూలన, పేదవారికి విద్య వంటి సామాజికసేవలకు ధన సహాయం చేస్తున్నాడు.