కరోనా ఎఫెక్ట్ తో పలు దేశాలు ఫ్లైట్స్ సర్వీసులను నిలిపివేస్తున్న నేపథ్యంలో విదేశాల్లోని తమ పౌరులు వెంటనే తిరిగి రావాలని యూఏఈ కోరింది. విదేశీ పర్యటనలో ఉన్నా, చదువు కోసం విదేశాలకు వెళ్లిన వారి కోసం విదేశాంగ శాఖ ఈ సూచనలు చేశారు. రాబోయే రోజుల్లో ఫ్లైట్ ప్రయాణాలపై మరింత రిస్ట్రిక్షన్ ఉండే అవకాశాలు ఉన్నాయని, ఇప్పటికే పలు దేశాలు అంతర్జాతీయ విమాన సర్వీసులను రద్దు చేసిన విషయాన్ని అధికారులు గుర్తు చేశారు. విదేశాల్లో చదువుకునే విద్యార్ధులు అనారోగ్యం బారిన పడితే యూఏఈ ఎంబసీ ద్వారా స్కాలర్ షిప్ ఎజెన్సీలను సంప్రదించాలని కూడా సూచించింది. అలాగే విదేశాల్లో ఉన్న వారి అక్కడి మిషన్స్ ను సంప్రదించి తమ పేరును రిజిస్టర్ చేసుకోవటం తప్పనిసరి అని అన్నారు.

ఇదిలాఉంటే పలు దేశాలు జాతీయ, అంతర్జాతీయ సర్వీసులపై ఆంక్షలు విధించిన నేపథ్యంలో ఫ్లై దుబాయ్ సర్వీసులను నిలిపివేశారు. మార్చి 31 వరకు బహ్రెయిన్, సౌదీ అరేబియాకు వెళ్లే ఫ్లైట్స్ ను రద్దు చేశారు. అలాగే మార్చి 14 నుంచి 19 కువైట్ ఫ్లైట్స్, మార్చి 17 నుంచి మార్చి 31 వరకు ఇండియా వెళ్లే సర్వీసులను కూడా నిలిపివేశారు. ఇరాన్, జోర్డాన్, లెబనాన్, ఇరాక్, టర్కీ, సుడాన్ వెళ్లే ఫ్లైట్ సర్వీసులను కూడా రద్దు చేశారు. మళ్లీ ఎప్పుడు పునరుద్దరిస్తారో కూడా నిర్ణయించలేదు.