పవిత్ర రమదాన్ మాసం సందర్భంగా ఇఫ్తార్ కోసం కేటాయించే నిధులను ఈ ఏడాది మరింత పెంచింది సౌదీ ప్రభుత్వం. 18 దేశాల్లో నిర్వహించే ఈ మీల్స్ ప్రాజెక్ట్ కోసం SR5 మిలియన్లను కేటాయించేందుకు సౌదీ అరేబియా రాజు సల్మాన్ ఆమోదం తెలిపారు. ఇస్లామిక్ వ్యవహారాల మంత్రిత్వ శాఖ ఆధ్వర్యంలో జరిగే ఈ కార్యక్రమం నిర్వహిస్తారు. రమదాన్ మాసంలో దాదాపు 18 దేశాల్లోని 10 లక్షల మందికి ఇఫ్తార్ భోజనాలను సమకూర్చనున్నారు. అయితే..ప్రతి ఏడాది తరహాలో కాకుండా ఈ సారి ఫుడ్ బాస్కెట్ల రూపంలో ఆహారాన్ని అందించనున్నారు. కరోనా వైరస్ విపత్తు నేపథ్యంలో ఈ నిర్ణయం తీసుకున్నట్లు ఇస్లామిక్ వ్యవహారాల మంత్రిత్వ శాఖ తెలిపింది. ఇప్పటికే ఆయా దేశాల్లోని ఇస్లామిక్ కేంద్రాలతో సంప్రదింపులు జరిపి ఇఫ్తార్ భోజనాల కోసం కావాల్సిన ఏర్పాట్లు చేసినట్లు వెల్లడించింది.