అమెరికా అధ్యక్షుడు డోనాల్ట్ ట్రంప్‌పై.. ఆ దేశ మాజీ జాతీయ భద్రతా సలహాదారుడు బోల్టన్ సంచలన వ్యాఖ్యలు చేశారు. ఈ ఏడాది నవంబర్‌లో జరగనున్న అధ్యక్ష ఎన్నికల్లో విజయం సాధించేందుకు చైనా అధ్యక్షుడు జీ జిన్‌పింగ్ సహాయాన్ని ట్రంప్ కోరినట్లు ఆయన ఆరోపించారు. ఈ ఏడాది నవంబర్‌లో అమెరికా అధ్యక్ష ఎన్నికలు జరగనున్నాయి. ఆ ఎన్నికల్లో డోనాల్డ్ ట్రంప్ పోటీ చేయనున్నారు. రెండవ సారి అధికారాన్ని చేజిక్కించుకునేందుకు జిన్ పింగ్ సహాయాన్ని ట్రంప్ కోరినట్లు బోల్టన్ ఆరోపించారు. కొత్తగా రాసిన ఓ పుస్తకంలో బోల్టన్ ఈ విషయాన్ని వెల్లడించారు. అమెరికా రైతులకు చెందిన వ్యవసాయ ఉత్పత్తులను చైనా కొనుగోలు చేయాలని ట్రంప్ భావిస్తున్నట్లు బోల్టన్ తన పుస్తకంలో తెలిపారు. శ్వేతసౌధాన్ని ఎలా నడుపాలన్న దానిపై ట్రంప్‌కు ఎటువంటి క్లారిటీ లేదన్నారు.

బోల్టన్ రాసిన పుస్తకాన్ని రిలీజ్ చేయకుండా ఉండేందుకు ట్రంప్ ప్రభుత్వం అడ్డుకుంటున్నట్లు ఆరోపణలు వస్తున్నాయి. ద రూమ్ వేర్ ఇట్ హ్యాపెన్డ్ అనే 577 పేజీల పుస్తకాన్ని బోల్టన్ రాశారు. జూన్ 23వ తేదీ నుంచి ఆ పుస్తకం మార్కెట్‌లో అందుబాటులో ఉంటుంది. పుస్తకం రిలీజ్‌ను ఆపాలని ట్రంప్ సర్కార్‌కు చెందిన న్యాయశాఖ.. ఓ జడ్జి నుంచి ఆదేశాలు కోరినట్లు తెలుస్తోంది. ఇప్పటికే ప్రపంచ వ్యాప్తంగా వేలాది మందికి ఈ పుస్తకం చేరిందని, జడ్జి ఆదేశాలతో తమకు ఎటువంటి నష్టం ఉండదన్న అభిప్రాయాలు వ్యక్తం అవుతున్నాయి.

అమెరికా ప్రభుత్వ జాతీయ సలహాదారుడిగా బోల్టన్‌.. ఏప్రిల్ 2018 నుంచి ఆ ఏడాది సెప్టెంబర్ వరకు పనిచేశారు. ఆ తర్వాత ఆయన రాజీనామా చేశారు. ట్రంప్ విధానాలను వ్యతిరేకించిన బోల్టన్‌.. శ్వేతసౌధాన్ని విడిచి వెళ్లారు. కానీ బోల్టన్‌ను తానే సాగనంపినట్లు ట్రంప్ చెబుతున్నారు. బోల్టన్ చట్టాన్ని ఉల్లంఘించారని, అందుకే ఆయన్ను తొలగించినట్లు ట్రంప్ తెలిపారు.