కువైట్:మూడు నెలల తర్వాత జ్లీబ్, మహ్బౌల్లా, అల్ షుయౌఖ్ ప్రాంతాలకు లాక్ డౌన్ నుంచి విముక్తి కలగనుంది. ఈ మూడు ప్రాంతాల్లో లాక్ డౌన్ ఎత్తివేయాలని కువైట్ మంత్రి మండలి నిర్ణయించింది. ఈ నెల 9 ఉయదం 5 గంటల నుంచి కేబినెట్ నిర్ణయం అమలులోకి రానుంది. ఈ మూడు ప్రాంతాల్లో ప్రవాసీయులే ఎక్కువగా ఉంటారు. అయితే..కరోనాకు హాట్ స్పాట్ గా మారటంతో ఏప్రిల్ 6 నుంచి పూర్తిస్థాయిలో లాక్ డౌన్ అమలులో ఉంది. ఇదిలాఉంటే...కరోనా తీవ్రత ఇంకా అదుపులోకి రాకపోవటంతో వైద్యశాఖకు KD75 మిలియన్లను కేటాయిస్తున్నట్లు మంత్రిమండలి సమవేశంలో ప్రధాని ప్రకటించారు. కరోనాను ఎదుర్కొనేందుకు కావాల్సిన వ్యాక్సిన్, ఇతర మెడికల్ కిట్లను కొనేందుకు ఈ మొత్తాన్ని వినియోగించనున్నారు. అలాగే లాక్ డౌన్ కారణంగా ప్రైవేట్ రంగంపై ఎలాంటి నెగటీవ్ ప్రభావం పడకుండా మానవ వనరులశాఖ కు KD240 మిలియన్లను కేటాయించారు.