ఒమాన్ దేశంలో ఇబ్బందుల్లో ఉన్న భారతీయ కార్మికుల కోసం అక్కడి భారత ఎంబసీ ఓ మొబైల్‌ యాప్‌ విడుదల చేసింది. 'మిగ్‌కాల్‌' పేరుతో విడుదల చేసిన ఈ యాప్‌ను ఇప్పటికే పదివేల మంది డౌన్‌లోడ్‌ చేసుకున్నారు. అత్యవసర పరిస్థితుల్లో ఇంటర్నెట్‌ లేని సమయాల్లో కూడా ఈ యాప్‌ ద్వారా సహాయం పొందడానికి సులువుగా ఉంటుందని ఎంబసీ అధికారులు వెల్లడించారు. ఒమాన్ లో భారత అంబాసిడర్‌ ఇంద్రామణి పాండే గత నెలలో మిగ్‌కాల్‌ యాప్‌ను లాంచ్‌ చేశారు. పదివేల మంది ఈ యాప్‌ను డౌన్‌లోడ్‌ చేసుకున్నట్లు ఎంబసీ ఓ ప్రకటనలో తెలిపింది. ఈ యాప్‌ వివిధ భారతీయ భాషలు హిందీ, మలయాళం, తెలుగు, తమిళం, కన్నడ, బెంగాలీ, ఇంగ్లీష్‌ భాషల్లో ఉంటుంది.