జెడ్డా: సౌదీ అరేబియా జనరల్‌ డైరెక్టరేట్‌ ఆఫ్‌ పాస్‌పోర్ట్స్‌ (జవజాత్‌), వలసదారుల రీ-ఎంట్రీ వీసాల వ్యాలిడిటీని పొడిగిస్తున్నట్లు వెల్లడించింది. కరోనా వైరస్‌ నేపథ్యంలో అంతర్జాతీయ విమాన సర్వీసుల రద్దు కారణంగా ఈ నిర్ణయం తీసుకున్నట్లు పేర్కొంది జవజాత్‌. రెసిడెంట్‌ పర్మిట్స్‌ (ఇకామా) గడువు తీరి, స్వదేశానికి రావాలనుకుంటున్న లేబరర్స్‌, డొమెస్టిక్‌ వర్కర్స్‌ కోసం ఈ గడువు పెంపుని ప్రకటించారు. సెప్టెంబర్‌ 30 వరకు ఈ పెంపు వర్తిస్తుంది. ఇకామా పొడిగింపులో కమర్షియల్‌ ప్రొఫెషన్స్‌లో పనిచేస్తున్నవారికి కూడా అవకాశం కల్పించారు. ఆగస్ట్‌ 1 నుంచి 31 లోపు గడువు తీరేవారికి ఈ అవకాశం కల్పిస్తున్నారు. మార్చి 15 నుంచి సౌదీ అరేబియా అంతర్జాతీయ విమానాల రాకపోకల్ని సస్పెండ్‌ చేసిన విషయం తెల్సిందే.