కువైట్ సిటీ:కరోనాను నియంత్రించేందుకు కమిటీ నిర్దేశించిన మార్గనిర్దేశకాలను మరింత కఠినంగా అమలు చేయలనే దృఢనిశ్చయంతో ఉంది కువైట్ ప్రభుత్వం. కోవిడ్ నిబంధనలను సమర్ధవంతంగా అమలు చేసే బాధ్యతను రిటైర్డ్ లెఫ్టినెంట్ జనరల్ అబ్దుల్ ఫతా అల్ అలీకి అప్పగించింది. కోవిడ్ నియంత్రణ చర్యలను సమీక్షించేందుకు ప్రత్యేకంగా సమావేశమైన కువైట్ మంత్రి మండలి ఈ నిర్ణయాన్ని వెలువరించింది. ఇక నుంచి అబ్దుల్ ఫతా అల్ అలీ కోవిడ్ కమిటీని లీడ్ చేస్తారని, ప్రజల ఆరోగ్య పరిరక్షణకు అవసరమైన చర్యలను అమలు చేస్తారని ప్రకటించింది. గతంలో కువైట్ ట్రాఫిక్ చీఫ్ గా విధులు నిర్వహించిన అబ్దుల్ ఫతా అలీ..దేశంలో చట్టవ్యతిరేక కార్యకలాపాలు అరికట్టడంలో సమర్ధవంతమైన అధికారిగా గుర్తింపు పొందారు. ట్రాఫిక్ నిబంధనలు ఉల్లంఘించిన వందల మంది ప్రవాసీయులపై కోర్టు ద్వారా దేశబహిష్కరణ శిక్షలు పడేలా విధులు నిర్వహించారు. ఇదిలాఉంటే..కోవిడ్ నిబంధనలను పకడ్బందీగా అమలు చేసేందుకు ముసాయిదా చట్టాన్ని తీసుకురావాలని మంత్రిమండలి గతంలోనే నిర్ణయించిన విషయం తెలిసిందే. ఫేస్ మాస్కులు ధరించపోయినా, భౌతిక దూరం పాటించకపోయినా కఠిన చర్యలు తీసుకోవటం చట్టం లక్ష్యం.