మనామా :హోటల్ లోపల డైనింగ్ కు అనుమతి ఇస్తూ బహ్రెయిన్ ప్రభుత్వం నిర్ణయించింది. ఇక నుంచి రెస్టారెంట్లు, కేఫ్ లోపల కూడా డైనింగ్ కు వెసులుబాటు ఉండనుంది. లాక్ డౌన్ తర్వాత దాదాపు ఏడు నెలలుగా హోటల్స్ లోపల సర్వింగ్ పై నిషేధం ఉన్న విషయం తెలిసిందే. అన్ లాక్ ప్రక్రియలో భాగంగా దశల వారీగా ఆంక్షలను సడలిస్తూ వస్తున్న బహ్రెయిన్ ప్రభుత్వం గత సెప్టెంబర్ లోనే రెస్టారెంట్ వెలుపల ఔట్ డోర్ డైనింగ్ కు అనుమతి ఇచ్చింది. ఇక ఇప్పుడు తాజాగా ఇండోర్ డైనింగ్ కు కూడా గ్రీన్ సిగ్నల్ ఇచ్చింది. అయితే..రెస్టారెంట్లు, కేఫ్ లలో 30 మందికి మించి అనుమతించొద్దని కూడా షరతు విధించింది. ఆరోగ్య శాఖ జారీ చేసిన మార్గనిర్దేశకాలను ఖచ్చితంగా పాటించాలని హెచ్చరించింది. గతంలో ఔట్ డోర్ డైనింగ్ కు అనుమతి ఇచ్చిన సమయంలోనూ ఆరోగ్యశాఖ జారీ చేసిన మార్గనిర్దేశకాలను పాటించని పలు రెస్టారెంట్లపై చర్యలు తీసుకున్నారు. హోటల్స్, రెస్టారెంట్లు, కేఫ్ లలో కోవిడ్ నిబంధనల అమలుపై ఎప్పటికప్పుడు తనిఖీలు చేపడతామని, ఇది నిరంతరాయంగా కొనసాగే ప్రక్రియ అని ఆరోగ్య శాఖ అధికారులు హెచ్చరించారు.