మస్కట్: ఒమన్ లోని సీబ్ పరిధిలో భారీ అగ్నిప్రమాదం చోటు చేసుకుంది. కొన్ని నివాస సముదాయాల షెడ్డులో(కారవ్యాన్) భారీగా మంటలు చెలరేగాయి. క్షణాల్లోనే మంటలు చుట్టుపక్కల ప్రాంతాలకు విస్తరించాయి. అయితే..అగ్నిమాపక సిబ్బందికి ఘటనపై సమాచారం అందగానే సంఘటన స్థలానికి చేరుకొని మంటలను ఆర్పివేశారు. సీబ్ పరిధిలోని అల్ మాబిల్లాలో ప్రమాదం జరిగినట్లు సివిల్ డిఫెన్స్, అంబులెన్స్ అధికారులు తెలిపారు. మస్కట్ గవర్నరేట్ నుంచి అగ్నిమాపక సిబ్బంది సకాలంలో ఘటనా స్థలానికి చేరుకొని మంటలను అదుపు చేశారని, ఈ ప్రమాదంలో అదృష్టవశాత్తు ఎవరికి గాయాలు కాలేదని వెల్లడించారు.