కువైట్ సిటీ:కోవిడ్ 19 వ్యాక్సిన్ తీసుకునేందుకు కువైట్ పౌరులు, ప్రవాసీయుల నుంచి భారీ స్పందన కనిపిస్తోంది. వ్యాక్సిన్ తీసుకోవాలని అనుకునేవారు ముందుగా మంత్రిత్వ శాఖ వెబ్ సైట్లో తమ పేర్లను నమోదు చేసుకోవాలని కొద్ది రోజుల ముందే ప్రభుత్వం ప్రకటించిన విషయం తెలిసిందే. దీంతో వెబ్ సైట్ ద్వారా అంచాలకు మించి ప్రజలు తమ వివరాలను నమోదు చేసుకుంటున్నారని అధికారులు వెల్లడించారు. ఈ పరిణామం కువైట్ పౌరుల్లో, ప్రవాసీయుల్లో ఆరోగ్యంపై అవగాహన, శ్రద్ధ పెరిగిందని చెప్పేందుకు నిదర్శనమని అభిప్రాయపడ్డారు. మరోవైపు అత్యవసర ప్రతిపాదికన తుది అనుమతులు పొందిన ఫైజర్ వ్యాక్సిన్ అతి త్వరలోనే కువైట్ చేరుకోనుంది. వ్యాక్సిన్ రాగానే ప్రధాన్యత ప్రకారం ప్రజలకు అందించేందుకు అధికార యంత్రాంగం సమాయత్తం అవుతోంది. ఎగ్జిబిషన్ హాల్ లో ఇప్పటికే వ్యాక్సిన్ ను భద్రపరిచేందుకు అవసరమైన శీతలీకరణ యంత్రాలను ఏర్పాటు చేశారు. ఒకట్రెండు రోజుల్లో థర్మల్ స్క్రీనింగ్, సిబ్బందికి ప్రత్యేక గదులు, ఇతరాత్ర సాహాయక సిబ్బంది ఎగ్జిబిషన్ హాల్ కు చేరుకుంటారని అధికారులు వివరించారు.

--దివాకర్(మాగల్ఫ్ ప్రతినిధి,కువైట్)