టర్కీ:ప్రపంచంలో విలువైన మూలకాల్లో బంగారం కూడా ఒకటిగా మారింది.దీంతో బంగారం నిక్షేపాల కోసం అన్ని దేశాలు నిత్యం పరిశోధన చేస్తూనే ఉన్నాయి. అయితే, టర్కీలో బంగారం నిక్షేపాల నిధి బయటపడింది.ఈ నిధిలో 99 టన్నుల బంగారం విలువ 6 బిలియన్ డాలర్లు(రూ.44,139 కోట్లు) ఉండొచ్చని నిపుణులు పేర్కొన్నారు.టర్కీలోని సోగుట్ సెంట్రల్ వెస్ట్ ప్రాంతంలో నిధిని కనుగొన్నారు.వ్యవసాయ క్రెడిట్ కోఆపరేటివ్స్ , గుబ్రేటాస్ ఎరువుల ఉత్పత్తి సంస్థ  (Gubretas Fertilizers) చీఫ్ ఫహ్రెటిన్ పోయరాజ్ ఈ బంగారం నిధిని గుర్తించారు.

రాబోయే రెండేళ్లలో ఈ బంగారాన్ని తవ్వితీస్తామని ఫహ్రెటిన్ పోయ్రాజ్ అన్నారు. ఇది టర్కీ ఆర్థిక వ్యవస్థకు బలోపేతానికి ఎంతో ఉపయోగపడుతుందని పేర్కొన్నారు. బంగారు నిధి బటయపడిందన్న వార్తలతో గుబ్రేటాస్ షేర్ ధరలు 10 శాతం మేర ఎగబాకాయి.

టర్కీలో ఈ ఏడాది 38 టన్నుల బంగారం ఉత్పత్తి చేసి రికార్డు సాధించింది. దాన్ని 100 టన్నులకు పెంచడమే తమ లక్ష్యమని సెప్టెంబరులో ఇంధన సహజ వనరుల మంత్రి ఫాతిహ్ డోన్మెజ్ తెలిపారు.