యూఏఈ వ్యాప్తంగా పలు ప్రాంతాల్ని పొగ మంచు కమ్మేస్తోంది. ఈ కారణంగా విజిబులిటీ గణనీయంగా తగ్గిపోతోంది. సోమవారం అర్థరాత్రి నుంచి పొగమంచు తీవ్రత ఎక్కువగా కనిపిస్తోంది. వాహనదారులు పొగ మంచు కారణంగా తీవ్ర ఇబ్బందులు ఎదుర్కొంటున్నారు. కాగా, వాహనదారులు అప్రమత్తంగా వుండాలనీ, వేగ పరిమితికి లోబడి వాహనాలు నడపాలని అథారిటీస్ సూచిస్తున్నాయి. అబుదాబీ పోలీస్, వాహనాల వేగ పరిమితిని తగ్గిస్తున్నట్లు ప్రకటించడం జరిగింది. క్యాపిటల్ వైపుగా వచ్చే రోడ్లపై వేగ పరిమితిని గంటకు 80 కిలోమీటర్లకే తగ్గించారు. అబుదాబీ అల్ అయిన్ రోడ్డు, అల్ ఫయాహ్ రోడ్డు, షేక్ ఖలీఫా ఇంటర్నేషనల్ రోడ్డు, షేక్ ఖలీఫా బిన్ జాయెద్ రోడ్డు, షేక్ మొహమ్మద్ బిన్ రషీద్ మరియు మక్తౌమ్ బిన్ రషీద్ రోడ్లపై వేగ పరిమితిని తగ్గించారు. ఆయా రోడ్లపై ఏర్పాటు చేసిన స్మార్టు బోర్డులపై ప్రదర్శితమయ్యే సూచనలను వాహనదారులు ఫాలో అవ్వాల్సి వుంటుంది. ముందు, వెనుక వాహనాలతో తగిన దూరాన్ని వాహనదారులు పాటించాలి.