కువైట్ సిటీ:అక్రమంగా మద్యం బాటిళ్లను కలిగి ఉన్న ఓ ప్రవాసీయుడ్ని అరెస్ట్ చేసినట్లు కువైట్ అంతర్గత మంత్రిత్వ శాఖ వెల్లడించింది. నిందితుడి దగ్గర్నుంచి 356 విదేశీ మద్యం బాటిళ్లను స్వాధీనం చేసుకున్నట్లు స్పష్టం చేసింది. హవాలీ ప్రాంతంలో పోలీసులు పాట్రోలింగ్ చేస్తుండగా మద్యం బాటిళ్ల బాగోతం బయటపడింది. సాధారణ పాట్రోలింగ్ లో భాగంగా అటుగా వెళ్తున్న పోలీసులు..ముగ్గురు వ్యక్తుల తీరు అనుమానస్పదంగా కనిపించింది. ఆ ముగ్గురు వ్యక్తులు ఒక వాహనం నుంచి మరో వాహనంలోకి ఎక్కువ సంఖ్యలో బ్యాగులను మార్చుతున్నట్లు గమనించిన పోలీసులు..బ్యాగుల విషయమై ఆరా తీసేందుకు వాహనాల దగ్గరికి వెళ్లారు. అయితే..పోలీసులు తమ వైపే వస్తుండటాన్ని గమనించిన నిందితులు బ్యాగులను అక్కడే పడేసి పరుగందుకున్నారు. మొత్తం ముగ్గురు నిందితుల్లో ఇద్దరు తప్పించుకొని పారిపోగా..ఓ వ్యక్తిని మాత్రం పోలీసులు పట్టుకొని అరెస్ట్ చేశారు. బ్యాగులను తనిఖీ చేయగా అందులో 356 ఇంపోర్టెడ్ లిక్కర్ బాటిల్స్ ఉన్నట్లు గుర్తించారు. మిగిలిన ఇద్దరు నిందితుల కోసం ఆరా తీస్తున్నామని పోలీసులు వివరించారు.