కువైట్ సిటీ:ఎలాంటి అనుమతులు లేకుండా, లైసెన్స్ తీసుకోకుండా సోషల్ మీడియాలో న్యూస్ అకౌంట్లను నిర్వహిస్తే జరిమానా ఎదుర్కొవాల్సిందేనని కువైట్ న్యాయ వ్యవస్థ హెచ్చరించింది.ట్విట్టర్ లో అతీజ్ అల్-మాసియన్ అనే పేరుతో న్యూస్ అకౌంట్ ను నిర్వహిస్తున్న వ్యక్తికి 5000 దినార్ల జరిమాన విధిస్తూ అప్పీల్ కోర్టు, క్రిమినల్ కోర్టు గతంలో తీర్పునిచ్చాయి. అయితే..ఈ తీర్పును నిందితుడు సవాల్ చేయటంతో కేసు పూర్వపరాలను పరిశీలించిన కోర్ట్ ఆఫ్ కాసేషన్...నిందితుడికి 5000 దినార్ల జరిమానా విధించటాన్ని సమర్ధించింది. జ్యూడిషియరీ రెగ్యూలేషన్స్ మేరకు లైసెన్స్ లేకుండా న్యూస్ అకౌంట్ల నిర్వహణ నేరమేనని స్పష్టం చేసింది.అయితే..సౌదీ అరేబియా, ఈజిప్ట్, ఎమిరాతిలను అవమానించేలా, జాతీయ ప్రయోజనాలకు భంగం కలిగించేలా తప్పుడు వార్తలు, పుకార్లను ప్రసారం చేశారనే ఆరోపణలను మాత్రం తోసిపుచ్చింది.ఈ ఆరోపణల్లో ప్రతివాదులు నిర్దోషులు అని తీర్పునిచ్చింది.