బహ్రెయిన్:ప్రతి యేటా నిర్వహించే ట్రాఫిక్ వీక్ ను ఈ ఏడాది కూడా నిర్వహించేందుకు బహ్రెయిన్ సిద్ధమవుతోంది. ట్రాఫిక్ రూల్స్ పై వాహనదారుల్లో అవగాహన కల్పించటం..రోడ్డు ప్రమాదాలను నివారించేందుకు పాటించాల్సిన జాగ్రత్తలను సూచిస్తూ బహ్రెయిన్ ప్రతి యేటా వారం రోజుల పాటు ట్రాఫిక్ వీక్ నిర్వహిస్తూ ఉంటుంది. సాధారణంగా మార్చి నెలలో ఎక్కువగా ఈవెంట్ ఉంటుంది. ఈ ఏడాది కూడా ట్రాఫిక్ వీక్ 2021 నిర్వహించేందుకు తాము సన్నద్ధమైనట్లు ట్రాఫిక్ డైరెక్టర్ జనరల్ బ్రిగేడియర్ షేక్ అబ్దుల్ రెహ్మాన్ బిన్ అబ్దుల్ వాహబ్ అల్ ఖలీఫా తెలిపారు.అయితే..ప్రపంచం ఆరోగ్య సంక్షోభ సవాళ్లను ఎదుర్కొంటున్న పరిస్థితుల్లో నిర్వహించాల్సి వస్తోందని అన్నారు. అయితే..ట్రాఫిక్ పట్ల అవగాహన కల్పిస్తూ..ఎప్పటికప్పుడు చేపడుతున్న సంస్కరణ చర్యలు సత్ఫలితాలను ఇస్తున్నట్లు ఆయన వివరించారు.ఈ-సర్వీస్ సేవలను వినియోగించుకుంటున్న వారి సంఖ్య 43 శాతం పెరిగిందన్నారు. ప్రజల సహకారంతోనే ఇది సాధ్యమైందన్నారు.