కువైట్: కరోనా కట్టడికి పాక్షిక కర్ఫ్యూ విధించిన కువైట్..కర్ఫ్యూ సమయంలో స్వల్ప మార్పులు చేసింది. ఇన్నాళ్లు సాయంత్రం 5 గంటల నుంచి ఉదయం 5 గంటల వరకు కర్ఫ్యూ పాటించారు. అయితే..ప్రభుత్వం తీసుకున్న తాజా నిర్ణయం మేరకు ఇక నుంచి సాయంత్రం 6 గంటల నుంచి ఉదయం 5 గంటల వరకు కర్ఫ్యూ అమలులో ఉంటుంది. మార్చి 23(మంగళవారం ) నుంచి ఈ నిర్ణయం అమలులో ఉంటుంది. అలాగే కర్ఫ్యూ సమయంలో సాయంత్రం 6 గంటల నుంచి రాత్రి 10 గంటల వరకు రెస్టారెంట్లు డెలివరీ సర్వీసులను అందించొచ్చని స్పష్టం చేసింది. ఇక నివాస ప్రాంగణాల్లో సాయంత్రం 8 గంటల వరకు జనాలు బయట నడిచేందుకు అనుమతి ఉంటుంది. ఇదిలాఉంటే..వ్యాక్సిన్ తీసుకున్న వారికి క్వారంటైన్ నుంచి మినహాయింపు ఇస్తున్నట్లు కువైట్ ప్రకటించింది. రెండు డోసులు తీసుకొని వారం రోజులు పూర్తైన వారు క్వారంటైన్ లో ఉండాల్సిన అవసరం లేదు. అలాగే మొదటి డోసు మాత్రమే తీసుకుంటే ఐదు వారాల తర్వాతే క్వారంటైన్ నుంచి మినహాయింపు ఉంటుంది.